१५ भदौ, काठमाडौं । दाङ घोराहीका शिव गिरी सदाझैं बुधबार बिहान साढे ७ बजे डिउटीका लागि निस्किए । गिरी २१६ मेगावाट क्षमताको माथिल्लो त्रिशूली जलविद्युत् आयोजनामा कार्यरत छन् । उनी ल्याब टेक्निसियन हुन् ।
त्यो दिन उनले ३ नम्बर सुरुङमा जानुपर्ने थियो । जाने बाटोमा सुख्खा पहिरो गयो । त्यसपछि उनीसहितका साथीले पहिरो गएको जानकारी अफिसलाई गराएर बस्ने ठाउँतिर फर्किए ।
कोठा फर्किन नपाउँदै गिरिले खबर पाए– माथिबाट बाढी आइरहेको छ, अरूलाई पनि खबर गर्नू ।
खबर पाउनेबित्तिकै उनी र साथीहरू हतारहतार आफू बस्ने क्याम्पतिर दौडिए । उनीहरू आफू त जोगिए । तर, आफ्नै आँखाअगाडि बाढीले आफू चढ्ने गाडी, अन्य साथीहरू, पुल, क्याम्प र संरचना बगाएको दृश्य देखे ।
‘५० मिटर उचाइसम्म ढुंगा पल्टाउँदै पुल, क्याम्प भत्काउँदै बाढी हामीसामुन्ने आइपुग्यो,’ गिरी सम्झन्छन्, ‘हामी दुई सेकेन्डले जंगलतिर हाम फालेर बाँच्न सफल भयौं ।’
दृश्य सम्झँदै उनले अगाडि भने, ‘त्यहाँ बाटोमा मान्छ दौडिइरहेका थिए, गाडीहरू थिए । सबै सोहरेर लग्यो । केही बाँकी राखेन ।’
