भोटेकोशी-त्रिशूली बाढीको सातौँ दिनमा यस घटनासम्बन्धी मुख्यमुख्य अप्डेट यस प्रकार छन्-
यससँगै हामी आजका लागि यो पेजमा अप्डेटहरू स्थगित गर्दै छौँ। भोलि बिहान तथा महत्त्वपूर्ण जानकारी प्राप्त हुनासाथ हामी यसलाई पुनः सुरु गर्ने छौँ।
तस्बिर स्रोत, Chinese Embassy in Nepal
चीन सरकारले पठाएको अर्को खेपका उद्धार सामग्रीहरू मङ्गलवार साँझ काठमाण्डू आइपुगेको नेपाल सरकारले जनाएको छ।
विज्ञान, प्रविधि तथा नवप्रवर्तन महावीर पुनका अनुसार सैनिक जहाजमार्फत् अघि साँझ चिनियाँ सामग्री काठमाण्डू आइपुगेको हो।
“आज आएका सामानहरूमा केही महत्त्वपूर्ण सामानहरू जस्तै डीएनए जाँच्ने मशिनहरू र ७० किलोसम्म बोक्ने ड्रोनहरू छन्,” मन्त्री पुनले सामाजिक सञ्जालमा लेखेका छन्।
चिनियाँ विदेश मन्त्रालयले दोस्रो खेपमा कार्गो ड्रोनहरू, डीएनए फरेन्सिक विज्ञहरूसहित डीएनए परीक्षण कीटहरू, पानी शुद्धीकरण उपकरण तथा प्रकाशसम्बन्धी उपकरणहरू रहेका जनाएको छ।
नेपालका लागि चिनियाँ राजदूतले ती सामानहरू हस्तान्तरण गरेका मन्त्री पुनले बताएका छन्।
तस्बिर स्रोत, ASHOK DEVKOTA
सरकारले कृष्णभीरको भित्तापट्टि 'ग्याबियन ब्रेस्ट वाल' माथिबाट सवारीसाधन सञ्चालन गर्न मिल्ने गरी आवश्यक संरचना निर्माणको कार्य तत्काल अघि बढाउने बताएको छ।
कृष्णभीरमा सडक भासिएपछि काठमाण्डूसँगको सम्पर्क टुटेको पृथ्वी राजमार्गको खण्ड सञ्चालन गर्नेबारे मङ्गलवार पूर्वाधार विकास मन्त्रालयमा बसेको बैठकले उक्त निर्णय गरेको हो।
कृष्णभीरको विकल्पमा टनेल वा बाइपास सडक निर्माणका सम्भावित विकल्पहरूको तत्काल अध्ययन गरी चालु आर्थिक वर्षको अन्त्यसम्म वैकल्पिक सडक व्यवस्था गर्ने समेत बताइएको छ।
यसअघि अधिकारीहरूले उक्त सडक कहिलेसम्म खुलाउन सकिने प्रस्ट नभएको बीबीसीलाई बताएका थिए।यसबारेको सामग्री पढ्नुहोस्।
गृहमन्त्री सुधन गुरुङले गत साताको भोटेकोशी-त्रिशूली बाढीपछिको अवस्थामा उद्धार र राहतका प्रयासमा सरकार आफ्नो 'कर्तव्य र जिम्मेवारीबाट पछाडि नहट्ने' अनि यसमा केही ढिलाइ भएमा राज्यले 'माफी माग्ने' समेत बताएका छन्।
मङ्गलवार एक पत्रकार सम्मेलन गर्दै गृहमन्त्रीले उद्धारका लागि सरकारले 'सक्दो' प्रयास गरिरहेको तर हिलोको दलदललगायतका अवस्थाका कारण उद्धार प्रयास प्रभावित भएको दाबी गरे।
गुरुङका अनुसार सरकारले अहिले जीवित व्यक्तिको उद्धारलाई नै पहिलो प्राथमिकता दिएको बताए।
हिजो सामाजिक सञ्जालमा लेख्दै प्रधानमन्त्री वालेन्द्र शाह 'बालेन'ले पनि जीवित उद्धार नै सरकारको प्राथमिकता भएको बताएका थिए। यद्यपि सुरुङमा फसेका भनिएका मानिसहरूको उद्धारमा ढिलाइ भएको भन्दै कतिपयले सरकारको आलोचना गरिरहेका छन्।
गृहमन्त्री गुरुङले जारी उद्धार प्रयासमा संलग्न सुरक्षाकर्मीको प्रशंसा गर्दै सम्भाव्य विपद्बारे पूर्वसूचना दिने क्रममा कतिपय सुरक्षाकर्मी नै बेपत्ता हुन पुगेको जानकारी दिए।
अमेरिकी भौगर्भिक सर्वेक्षण निकाय यूएसजीएसले गत बुधवार नेपाल र तिब्बतको सीमावर्ती क्षेत्रमा एउटा "हिमनदी खण्डित भएको हुनाले" ठूलो बाढी आएको र विनाश निम्तिएको जनाएको छ।
विज्ञहरूले त्यस प्रकारको परिघटनालाई अङ्ग्रेजीमा 'ग्लेसिअल कोल्याप्स' भन्ने गरेका छन्।
विज्ञहरूका अनुसार हिमताल भत्किएर खसेको पहिरोले थुनेको खोलामा ताल बनेको र त्यो अकस्मात् भत्किँदा त्यसबाट तल्लो भेगमा बाढीका कारण विध्वंस भएको हो।
तिब्बतको सीमानजिकै रसुवामा अवस्थित हिमतालको एउटा भाग भत्किएर तिब्बततिर खसेको विज्ञहरूले बताएका छन्। उक्त घटनाबारे वैज्ञानिकहरूले विभिन्न कोणबाट अध्ययन र विश्लेषण गरिरहेका छन्।
तस्बिर स्रोत, Reuters
गत साता भदौ १० गते रसुवाको भोटेकोशी र तल त्रिशूली नदीमा आएको बाढीका कारण मृत्यु हुनेमध्ये १,०५६ जनाको शव फेला परेको नेपाल प्रहरीले जनाएको छ।
प्रहरीको वेबसाइटमा प्रकाशित विवरणअनुसार उक्त सङ्ख्या आज दिउँसो २ बजेसम्मको हो।
बाढीपछि अहिलेसम्म झन्डै ४,००० जना सम्पर्कविहीन भएको सरकारी निकायहरूले जनाएका छन्।
फेला परेका शवहरूमध्ये ९७२ को लासजाँच मुचुल्का सम्पन्न भएको र ५८ वटा शव आफन्तलाई हस्तान्तरण गरिएको प्रहरीले जनाएको छ।
फेला परेका शवहरूको पहिचानका लागि डीएनए नमुना सङ्कलनदेखि आवश्यक प्रक्रिया पूरा गरी अहिलेसम्म १२१ महिला, १९८ पुरुष र ३६५ नखुलेको गरी जम्मा ६८४ वटा शवलाई जमिनमुनि गाडिएको छ। सरकारी निकायहरूले त्यसलाई "अस्थायी व्यवस्थापन" भनेका छन्।
पहिचान नभएका ८६९ वटा शवको विवरण नेपाल प्रहरीको वेबसाइटमा समेत अप्लोड गरिएको छ।
कहाँ कति शव फेला परे?
धादिङको कृष्णभीरमा सडक कटानमा परेपछि पृथ्वी राजमार्गमा सवारी आवागमन हुन सकेको छैन।
उक्त मार्ग हुँदै काठमाण्डू भित्रिने र बाहिरिने साना र ठूला सवारीसाधनका लागि प्रहरीले वैकल्पिक मार्ग निर्धारण गरेको छ। बीबीसी न्यूज नेपालीले ती मार्गलाई नक्सामा प्रस्तुत गरेको छ।
साना सवारीसाधनलाई हेटौँडाबाट काठमाण्डूतर्फ जाँदा कुलेखानी र सिस्नेरी हुँदै दक्षिणकालीको बाटो प्रयोग गर्न भनिएको छ।
तर काठमाण्डूबाट मकवानपुर जानका निम्ति १० चक्कासम्मका सवारीसाधनले कान्ति राजमार्ग प्रयोग गर्नुपर्ने छ।
पृथ्वी राजमार्ग बन्द भएपछि काठमाण्डू आउन कस्ता गाडीलाई अनुमति, कस्तालाई रोक? विस्तृतमा पढ्नुहोस्।
बुधवार भोटेकोशी र तल त्रिशूली नदीमा आएको बाढीका कारण विस्थापित भएका र उद्धार गरिएका मानिसहरूलाई विभिन्न स्थानमा स्थापित होल्डिङ सेन्टरमा राखिएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
(दिउँसो १ बजेसम्मको विवरण)
राष्ट्रिय सभाले भोटेकोशीको बाढीबाट भएको जनधनको क्षतिप्रति दुःख व्यक्त गर्दै विशेष प्रस्ताव पारित गरेको छ।
सभाको आजको बैठकमा अध्यक्ष नारायणप्रसाद दाहालले उक्त विशेष प्रस्ताव प्रस्तुत गरेका थिए। सभाले उक्त प्रस्ताव सर्वसम्मतिमा पारित गरेको राष्ट्रिय समाचार समितिले जनाएको छ।
सभाको बैठकले भोटेकोशी बाढीबाट ज्यान गुमाउने नागरिकप्रति श्रद्धाञ्जलि र परिवारजनमा समवेदना व्यक्त गरेको छ।
विशेष प्रस्तावमा बाढी प्रभावितको उद्धार, राहत र पुनःस्थापना तथा सम्पर्कविहीनको खोजी, घाइतेको निःशुल्क उपचार, वैज्ञानिक शव व्यवस्थापन गर्नुपर्ने उल्लेख छ।
“भौतिक संरचनाको पुनःनिर्माणका लागि तीनै तहका सरकार, स्थानीय समुदाय, नागरिक समाज, निजी क्षेत्र, विकास साझेदार तथा अन्तर्राष्ट्रिय समुदायको सहयोग, सहकार्य र समन्वयमा राष्ट्रिय एकता कायम गरी विपद् व्यवस्थापन गर्न र भविष्यमा विपद् जोखिम न्यूनीकरण गर्न प्रभावकारी उपाय अवलम्बन गर्न सरकारको विशेष ध्यान जाओस्,” विशेष प्रस्तावमा भनिएको छ।
तस्बिर स्रोत, Guoxiong Zheng Via FFD Nepal
चीनको जलस्रोत मन्त्रालयलाई उद्धृत गर्दै नेपाली अधिकारीले रसुवामा बनेको 'लेक टू' हिमतालमा पानी जम्मा हुने क्रम जारी रहेको बीबीसीलाई बताएका छन्।
उक्त हिमतालमा अनुमानित ६.५ लाख घनमिटर पानी जम्मा भएको चिनियाँ विवरणमा उल्लेख गरिएको बाढी पूर्वानुमान महाशाखाका प्रमुख तथा वरिष्ठ जलविज्ञानविज्ञ विनोद पराजुलीले बताए।
"यो हिमताल भरिने अवस्थामा छ। त्यस कारण फुट्ने जोखिम रहने नै भयो," उनले भने।
यसबारे विस्तृत सामग्री यहाँ पढ्नुहोस्
रसुवामा 'फुट्ने जोखिम' मा रहेको भनिएको नयाँ हिमतालबारे हामीलाई के थाहा छ
नुवाकोटको बेत्रावतीमा एउटा घरमा २४ वटा शव फेला परेको नेपाल प्रहरीले जनाएको छ।
प्रहरीका अनुसार ड्रोन निगरानीका क्रममा एउटा शव देखिएपछि पुगिएको ठाउँमा आसपास थप शवहरू भएको हुन सक्ने आशङ्कामा खोजी गर्दा थप २३ वटा शवहरू फेला परेका हुन्।
फेला परेका शवमध्ये एउटा शव बालिकाको, ११ वटा पुरुषका र १२ वटा महिलाका रहेको बताइएको छ। आवश्यक "मुचुल्का कार्य सम्पन्न गरी शव व्यवस्थापनका लागि पठाउने कार्य भइरहेको" प्रहरीले जनाएको छ।
दलदले हिलोका कारण उक्त स्थानमा ती शव सङ्कलनका लागि हेलिकप्टर नै आवश्यक परेको प्रहरीको भनाइ छ।
तिब्बत हुँदै भोटेकोशी नदीमा आएको बाढीमा परी रसुवा जिल्लामा मृत्यु हुने मानिसहरूका शव जिल्लाका विभिन्न स्थानमा फेला परेका छन्। नेपाल प्रहरीका अनुसार आज बिहान ११ बजेसम्म रसुवा १०० वटाभन्दा बढी शव फेला परिसकेका छन्।
जिल्ला प्रहरी प्रमुख अशोक थापाले राष्ट्रिय समाचार समितिलाई दिएको जानकारीअनुसार जिल्लाको बेत्रावती, टिमुरे र स्याफ्रुबेँसी फेला परेका शवहरूमध्ये केवल छ वटाको पहिचान भएको छ।
उद्धारकर्ताहरूले फेला परेका शवलाई सङ्कलन गरी धुन्चे पठाउने तयारी गरेका छन्।
रसुवाका विभिन्न स्थानबाट स्वदेशी र विदेशी पर्यटकहरूसहित ठूलो सङ्ख्यामा मानिसहरू सम्पर्कविहीन छन्। खोजीकार्य जारी रहेको अधिकारीहरूले बताएका छन्।
विस्थापित मानिसहरू कहाँ छन्
बाढीबाट प्रभावित ६०० जनाभन्दा बढीको उद्धार गरिएको जानकारी सरकारी निकायहरूले दिएका छन्।
राष्ट्रिय समाचार समितिका अनुसार बेत्रावती कैँदलटारबाट विस्थापित भएका परिवारहरूलाई काठमाण्डूको तारकेश्वर नगरपालिकामा रहेको शान्ति टोलका विभिन्न स्थानमा राखिएको छ।
टिमुरे र स्याफ्रुबेँसीबाट विस्थापित भएकाहरूलाई रानीवनस्थित पहेँलो गुम्बामा राखिएको छ।
केही प्रभावितलाई धुन्चेस्थित टुर्कुछिलिङ गुम्बा र अन्यलाई दक्षिणी रसुवाको माझगाउँस्थित भीमसेन र शिवालय प्राविमा राखिएको जिल्ला विपद् व्यवस्थापन समितिले जनाएको छ।
हेलिकप्टरबाट राहत सामग्री
भोटेकोशी बाढीले पुल र सडक बगाउँदा रसुवाको पश्चिमी भेगमा रहेका थोमन, चिलिमे, गोल्जुङ, हाकु, डाँडागाउँ, ठूलोगाउँलगायत बस्तीमा हेलिकप्टरमार्फत् राहत सामग्री पुर्याइएको सहायक प्रमुख जिल्ला अधिकारी द्रुवप्रसाद अधिकारीले राससलाई बताए।
लहरेपौवा, बेत्रावती, पहिराबेँसी, राम्चे, टिमुरेको खैदी, विर्दिङ, शेर्पागाउँ, खाम्जिङ, स्याफ्रुसमेतका क्षेत्रमा पनि हेलिकप्टरमार्फत् खाद्यान्न ढुवानी भइरहेको राससले जनाएको छ।
'मोबाइल चार्ज गर्न घुम्ती सेवा'
बाढीसँगै विद्युत् सेवा अवरुद्ध भएपछि मोबाइल चार्ज गर्न गाडीमा जेनरेटर राखी घुम्ती सेवा उपलब्ध गराइएको रसुवा–नुवाकोट पर्यटन समाजले जनाएको छ।
अहिलेसम्म ५०० भन्दा बढी स्थानीय बासिन्दाले उक्त सेवा लिएको सो संस्थाका अध्यक्ष बलराम न्यौपानेले राससलाई बताए।
जिल्लाका अधिकांश क्षेत्रमा सञ्चार सम्पर्क पुनः सुरु भएको राससले जनाएको छ।
विद्युत् आपूर्ति नियमित बनाउन नेपाल विद्युत् प्राधिकरणले काठमाण्डूको बालाजुदेखि नुवाकोटको शिवपुरी, चौगडा, नर्जा, सरमथली, कालिकास्थान हुँदै धुन्चेसम्मको लाइन विस्तारको काम अघि बढाएको राससले जनाएको छ।
भोटेकोशी र त्रिशूली नदीमा आएको बाढीका कारण मृत्यु हुने मानिसहरूको शव फेला पर्ने क्रम जारी छ।
नेपाल प्रहरीले आज बिहान ११:०० बजेसम्म १ ,०१० जनाको मृत्यु भएको पुष्टि भएको विवरण आफ्नो वेबसाइटमा दिएको छ।
यसअघि राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज बिहान बीबीसी नेपालीलाई मृतकको सङ्ख्या ९८७ पुगेको जानकारी दिएको थियो।
अझै ठूलो सङ्ख्यामा मानिसहरू सम्पर्कविहीन छन्। अधिकारीहरूले खोजी कार्य जारी रहेको बताएका छन्।
रसुवादेखि नवलपरासी पश्चिमसम्म गरी आठवटा जिल्लामा शवहरू फेला परेका हुन्। नदीमा बगेर गएका शवहरू चितवनमा सर्वाधिक सङ्ख्यामा फेला परेका छन्।
नारायणी नदीमा बगेका केही शव भारतमा पनि फेला परेको प्रहरीले जनाएको छ।
फेला परेका शवहरूमध्ये निकै कमको मात्रै सनाखत र अन्तिम संस्कार भएको छ।
शवहरू सड्न थालेकाले स्थानीय अधिकारीहरूले तिनलाई अस्थायी व्यवस्थापन गर्न जमिनमुनि गाड्न थालेका छन्।
सम्बन्धित समाचार र भिडिओ
बाढीपछि भेटिएका शवमध्ये हालसम्म 'करिब ४% को मात्रै सनाखत'
बाढीले बगाएका शव पहिचान गर्न किन गाह्रो?
पहिचान नभएका शवको ‘अन्तिम संस्कार होइन, व्यवस्थापन’
भोटेकोशी हुँदै त्रिशूली नदीमा आएको बाढीले गरेको कटानका कारण काठमाण्डू उपत्यकालाई विभिन्न जिल्लासँग जोड्ने महत्त्वपूर्ण सडकहरू अवरुद्ध भएका छन्।
धादिङको कृष्णभीरमा सडक कटानमा परेपछि पृथ्वी राजमार्गमा सवारी आवागमन हुन सकेको छैन। उक्त मार्ग हुँदै काठमाण्डू भित्रिने र बाहिरने सवारीसाधनहरूले वैकल्पिक मार्ग प्रयोग गर्न थालेका छन्।
ठूला यात्रुवाहक र मालवाहक सवारीसाधनलाई कुन मार्ग
अहिलेको अवस्थालाई दृष्टिगत गर्दै प्रहरी प्रधान कार्यालयले मकवानपुर जिल्लाको हेटौँडादेखि काठमाण्डू उपत्यका जाने सवारीसाधनका लागि आजदेखि लागु हुने गरी नयाँ रूट निर्धारण गरेको छ।
राष्ट्रिय समाचार समितिका अनुसार १० चक्कासम्मका सम्पूर्ण मालवाहक तथा ठूला यात्रुवाहक सवारीसाधनहरूका लागि त्रिभुवन राजपथ प्रयोग गर्न भनिएको छ।
यद्यपि काठमाण्डूबाट मकवानपुर जानका निम्ति चाहिँ १० चक्कासम्मका सवारीसाधनले कान्ति राजमार्ग प्रयोग गर्नुपर्ने छ।
प्रहरी प्रधान कार्यालयका अनुसार मौसम र बाटोको अवस्था अनि यात्रुहरूको सुरक्षालाई समेत दृष्टिगत गर्दै कान्ति राजमार्ग हुँदै हेटौँडातर्फ जाने यात्रुवाहक सवारीसाधनहरूले अनिवार्य रूपमा साँझ ६ बजेभित्र मकवानपुर जिल्लाको इलाका प्रहरी कार्यालय ठिङ्गन चेकपोस्ट पार गरिसक्नुपर्ने छ।
साना सवारीसाधनलाई कुन मार्ग?
प्रहरी प्रधान कार्यालयले १४ सीटभन्दा कम क्षमता भएका साना यात्रुवाहक सवारीसाधन काठमाण्डूबाट हेटौँडातर्फ जाँदा फर्पिङ–फाखेल–कुलेखानी हुँदै भीमफेदीतर्फको रूट निर्धारण गरेको छ।
त्यस्ता सवारीसाधनलाई काठमाण्डूतर्फ जाँदा भीमफेदी–कुलेखानी –सिस्नेरी–दक्षिणकालीको बाटो प्रयोग गर्न भनिएको छ।
राष्ट्रिय समाचार समितका अनुसार मकवानपुरको त्रिखण्डीनजिकै रहेको बेलिब्रिजको भारवहन क्षमता कमजोर रहेको हुँदा इन्धन तथा भारी मालबाहक सवारीसाधनलाई उक्त बेलिब्रिज प्रयोग नगर्न बरु नजिकै रहेको अर्को डाईभर्शन प्रयोग गर्न भनिएको छ।
तस्बिर स्रोत, EPA/Shutterstock
तस्बिर स्रोत, REUTERS
तस्बिर स्रोत, Nepal Army/Handout via REUTERS
राष्ट्रिय विपद् जोखिम न्यूनीकरण तथा व्यवस्थापन प्राधिकरणले मङ्गलबार बिहान दिएको जानकारीअनुसार भोटेकोशी बाढीका कारण मारिनेहरूको सङ्ख्या ९८७ पुगेको छ।
अझै ३,९१६ जना हराइरहेको प्राधिकरणकी प्रवक्ता शान्ति महतले बीबीसीलाई बताएकी छन्।
सोमवार बिहानसम्म प्राधिकरणले दिएको जानकारीमा २,५०० भन्दा धेरै हराइरहेको देखिन्थ्यो तर दिउँसो उसले हराइरहेकाहरूको सङ्ख्या एक्कासि ४,२०० भन्दा धेरै पुगेको जनायो।
साँझ फेरि ३,९०० भन्दा केही बढी रहेको जानकारी दिइएको थियो।
त्यसरी चाँडोचाँडो सङ्ख्या फेरबदल किन भएको हो?
प्रवक्ता शान्ति महत भन्छिन्, “यति ठूलो विपद् भएको छ कि हामीलाई सम्बन्धित ठाउँहरूबाट नै पनि यकिन विवरण आउन समय लागिरहेको छ। खास गरी हराइरहेकाहरूको यकिन विवरण पाउन गाह्रो भइरहेको छ। ती ठाउँहरूबाट आएका अद्यावधिक विवरण राख्दा एकैचोटि धेरै सङ्ख्या बढेको देखिएको हो।”
“पछि जलविद्युत् केन्द्रहरूबाट केहीको उद्धार गरिएपछि ४,२०० बाट हामीले घटाएका हौँ,” उनले भनिन्।
झन्डै १,००० जनाको शव फेला परिसक्दा कमैको मात्र सनाखत हुन सकेको छ।
“सनाखत हुन नसक्दा हराइरहेको र मृतकको सङ्ख्या दोहोरिएको हुन सक्छ।”
जिल्लाका निकायहरूलाई जोडेर अब नयाँ एप बनाउँदै गरिएको र त्यसले यी विवरणहरू रुजु गरेर थप वैज्ञानिक बनाउन सकिने उनले आशा व्यक्त गरिन्।
पृथ्वी राजमार्गको कृष्णभीरमा सडक भासिएपछि काठमाण्डू उपत्यकाबाहिरका स्थानमा एलपी ग्यास सिलिन्डरमा भरिने राष्ट्रिय समाचार समितिले जनाएको छ।
सडक भासिएपछि ग्यास बोकेका ठूला सवारीसाधन 'बुलेट' जान नसक्ने अवस्था उत्पन्न भएपछि उपत्यका र छिमेकी जिल्लाका ग्यास उद्योगले उपत्यकाबाहिर सिलिन्डरमा ग्यास भरेर साना गाडीमार्फत ओसारपसार गर्ने योजना बनाएका छन्।
नेपाल एलपी ग्यास उद्योग सङ्घका अध्यक्ष देवान चन्दलाई उद्धृत गर्दै राससले नेपाल आयल निगमले उद्योगीहरूलाई राजधानीबाहिर ग्यास भर्न अनुमति दिएको जनाएको छ।
राससका अनुसार उपत्यका र छिमेकी जिल्लामा रहेका १६ वटा उद्योगले बारा, पर्सा, चितवन, मकवानपुर, नवलपरासी (बर्दघाट–सुस्तापूर्व) जिल्लाका उद्योगसँग समन्वय गरी ग्यास भर्ने भएका छन्।
उपत्यका र छिमेकी जिल्लामा मात्रै कुल खपतको ४० प्रतिशत बढी ग्यास आवश्यक रहेको चन्दले बताएका छन्।
सङ्घका सदस्य तथा बाबा ग्यासका सञ्चालक विमल कालाखेतीले कृष्णभीरको बाटो नखुलेसम्म अन्य उद्योगमा ग्यास भरेर वैकल्पिक बाटोबाट काठमाडौँ लगिने जानकारी दिए।
बाढीका कारण नयाँ सङ्कट, देशका अन्य भागलाई काठमाण्डू जोड्ने पृथ्वी राजमार्गको हिस्सा कटान
बुधवार भोटेकोशी र त्रिशूलीमा आएको विनाशकारी बाढीमा परेर मृत्यु हुने मानिसहरूको शव फेला पर्ने क्रम जारी छ।
अहिलेसम्म चितवनमा सर्वाधिक सङ्ख्यामा शवहरू फेला परेको सरकारी निकायहरूले जनाएका छन्। रसुवादेखि नवलपरासी पश्चिमसम्म गरी आठवटा जिल्लामा शवहरू फेला परेका छन्।
नेपाल प्रहरीले आफ्नो वेबसाइटमा प्रकाशित गरेको विवरणअनुसार हिजो साँझसम्म मृतकको सङ्ख्या ९५१ पुगेको पुष्टि भएको छ। तीमध्ये चितवनमा २८२ जनाको शव फेला परेको प्रहरीले जनाएको छ।
त्यसअघि राष्ट्रिय विपद् जोखिम न्यूनीकरण तथा व्यवस्थापन प्राधिकरणले मृतकको सङ्ख्या ९३९ भएको जनाएको थियो।
सरकारी निकायहरूले त्यसपछि अर्को विवरण दिएका छैनन्।
नेपाली सेना, नेपाल प्रहरी र सशस्त्र प्रहरीले मानिसहरूको खोजी, उद्धार र राहतमा सुरु दिनदेखि नै काम गर्दै आएका छन्।
त्यसमा जलविद्युत् आयोजनाका सुरुङमा फसेकालाई खोज्नेदेखि सडकमा भएका अवरोध हटाउने काममा पनि सुरक्षाकर्मीहरू खटिएका छन्।
भोटेकोशी र त्रिशूली नदीमा आएको बाढीबाट पुगेको क्षति, खोजी तथा उद्धार, राहत र पुनःस्थापनाका विषयमा छलफल गर्न आज सर्वदलीय बैठक बस्न लागेको राष्ट्रिय समाचार समितिले जनाएको छ।
राष्ट्रिय स्वतन्त्र पार्टी (रास्वपा)का प्रवक्ता जगदीश खरेलका अनुसार बैठक आज दिउँसो २ः०० बजे सिंहदरबारस्थित रास्वपा संसदीय दलको कार्यालयमा बस्ने छ।
बैठकमा भोटेकोशी बाढीबाट भएको क्षतिको अवस्था, बेपत्ताको खोजी, प्रभावितको उद्धार, राहत वितरण तथा पुनःस्थापनाका विषयमा छलफल हुने जनाइएको छ।
तस्बिर स्रोत, BALEN SHAH/FACEBOOK
प्रधानमन्त्री वालेन्द्र शाहले तिब्बतसँगको सीमामा बुधवार आएको विनाशकारी बाढीलाई “सामान्य घटना नभएको” भन्दै यो जलवायु परिवर्तनका कारण भएको बताएका छन्।
सामाजिक सञ्जालमा एउटा पोस्ट गर्दै प्रधानमन्त्री शाहले अन्तर्राष्ट्रिय स्तरमा तत्काल कदम चाल्न माग गरेका छन्।
उनले यो घटना “हिमाली क्षेत्रमा हिउँ र बरफको हिमपहिरोका कारण उत्पन्न भएको यो क्षेत्रकै प्रमुख प्राकृतिक विपत्तिमध्ये एक” भएको बताएका छन्।
अधिकारीहरूका अनुसार प्रभावित क्षेत्रमा रहेका विभिन्न जलविद्युत् आयोजनाका सुरुङहरूमा उद्धारको प्रयास जारी छ। त्यहाँ सयौँ कामदार फसेको हुन सक्ने आशङ्का गरिएको छ।
यो विपत्तिमा अहिलेसम्म ९०० जना भन्दा बढी मानिसको मृत्यु भएको पुष्टि भएको छ भने झन्डै ४,००० जना सम्पर्कविहीन छन्।
आज भोटेकोशी-त्रिशूली बाढी आएपछिको सातौँ दिन। यो लाइभ पेजमा हामीले खोज, उद्धार र राहतसहित विभिन्न विषयमा ताजा जानकारी प्रस्तुत गरेका छौँ।
